يقلبي يصابر .. عليمن تكابر .. بعد ليله وحده .. وحبيبك يهاجر
شيطيب جراحك .. ياطلعة صباحك .. حبيبك يهاجر

يريت يطول ليلي والنجم يطفح .. شلي بمصباح يريت الصبح لاصبّح
الصبح تبدي المدامع عالأهل تسفح .. إذا جمّال أهلنا بالظعن طوّح
انصحك بالصبر ياقلبي المجرح .. صعوبه بالهوقت تلقى الذي ينصح
بدت نايباتي .. تقرب وفاتي .. وأبويه الأوده .. أعز من حياتي
تهيج نياحك .. ويا طلعة صباحك .. حبيبك يهاجر

شحلاته العمر لو ظل والدي يمي .. إذا يتركني يتركني بثقل هظمي
جنت أقعد وياه بيقظتي وحلمي .. يقلي ياسما الفرحه بسحر نجمي
من أشوفج أفرح وينزاح كل همي .. أسمج فاطمه واسمج اسم أمي
يقلبي بخيالي .. تطوف الليالي .. أبويه وحبيبي .. شكثر عندي غالي
برواحه ورواحك .. وياطلعة صباحك .. حبيبك يهاجر
******
شعلامك ياقلب تتصيد الأحزان .. تعثر بالنبض وتصدك الظلعان
أبويه هناك وأشوفك ناحل وذبلان .. شيصبر حالتك لو سارت الركبان
شكثر ظيم وقهر شايل يبو الأشجان .. تكابر عالهظم يافاقد الخلان
على فرقة خليلك .. مصايب تجيلك .. مينفع يقلبي .. نداك وعويلك
شينفعك صياحك .. ويا طلعة صباحك .. حبيبك يهاجر

شكثر ياقلب من أيامك تهاذر .. على حروف التمني عايش وصابر
يريت يظل أبويه وياي للآخر .. بلاكلمة يبويه عنك مسافر
يريت وياه أروحـ(ن) لمّن يهاجر .. بلا دمعة وداع وكسرة الخاطر
يقلبي وأريدك .. تعاين بعيدك .. وأظن حتى صبرك .. بعد مايفيدك
تصيبك رماحك .. ويا طلعة صباحك .. حبيبك يهاجر

*******

فجر باكر(باجر) ييبادر والدي ببمشاه .. وكل العيله تتبع هجرته ومسراه
بعد مايبقى والي ولا سند أرجاه .. حتى البمهد يرضع يروح وياه
وأظل آنا وحيده مرافقتني الآه .. أناحك بالقهر وبلهفتي الويلاه
لهيب إنتظاري .. يموت إصطباري .. تشيعك يقلبي .. طيور البراري
يتكسر جناحك .. وياطلعة صباحك .. حبيبك يهاجر

إذا شد الرحال وهاجر الوالي .. الف حسبه تمر باكر(باجر) على بالي
أشوف البيت يصفى من الأهل خالي .. وأقوم أذكر وجه كل غاليه وغالي
وأقولـ(ن) جانت هنا سكنه تبرى لي .. هنا جانت رقيه تقعد قبالي
هلي اللي أودهم .. تظل روحي عندهم .. إذا فارقوني .. أموتـ(ن) بعدهم
يموت إنشراحك .. وياطلعة صباحك .. حبيبك يهاجر

********

برمش عيني أنسجت جلباب أحزاني .. سقيت المنحلي دمعات أشجاني
عسى كفوف المصيبه تخيط أجفاني .. قبل هالسفر يريت الناعي ينعاني
وآخر كلمه ينطق لساني .. أموت ولاأودع ظعن ولياني
جمر حزني هايج .. وأصك للهوادج .. عليله ومصابي .. أنازع وأعالج
تخيب طماحك .. وياطلعة صباحك ... حبيبك يهاجر