أخذتي زهرة سنيني يا دنية - بعد گولي شتطلبيني يا دنية
بين العبرة - اوبين الجمرة - أجذب حسرة - إلفگد الزهرة

عتب بين الوصي اودنياه نسمع - يخاطب دنيته الفارس الأنزع
الغدر منچ يصب والحزن ينبع - إلچ هيهات يا هالدنية أخضع
إذا شفتي جفن عيناي يدمع - على الزهرة أحس چبدي تبضع
حزين اوعالحزن صابر يا دنية - على الهم مهجتي اتكابر يا دنية
شما أتألم - لا ما أهتم - وآنه امحزم - گلبي بصبره

أنا الدنيا يا حيدر وعرفتني - شبدت مني ذنوب او حاربتني
خطبت بضعة محمد وتركتني - يا حيدر بالثلاثة طلگتني
شتظن أنسى المهانة إلي هنتني - أعذبنك مثل ما عذبتني
خذت من عندك البضعة يا حيدر - أريدك تسفح الدمعة يا حيدر
شما تتمنى - ما تتهنى - وآنه أتحنى - بدم العترة

رضيت ابقهرچ اوهضمچ يا دنياي - إذا عندي ذنوب اتحاسبي اوياي
شلچ ويا الوديعة او نور عيناي - هاي الطاهرة او أم الحسن هاي
رميتيها ابسهم وإنشلت أعضاي - بفگد أم الحسن حلت مناياي
الوديعة يا ذنب عندها يا دنية - حبيب الباري والدها يا دنية
عذبتيها - وعصرتيها - اوألمتيها - ابذيج العصرة

أنا الدنية الدنية او دورتهم - أخس أولادي عدوانك شفتهم
ابثداية الخسة والذلة ارضعتهم - ابدوافع غدر يم بابك جبتهم
على دارك يا حيدر جمعتهم - اعلى كسر الضلع آنه إلشجعتهم
ابعثت لك أرذل أولادي يا حيدر - إغصبوا حگ بضعة الهادي يا حيدر
ما رحموها - او لا جلوها - بل خلوها - اتظل متحيرة

أنا حيدر أنا او جوهر صفاتي - يصبرني اعلى جمرة نايباتي
اشبعد عندچ يا دنية هموم هاتي - أنا إلي عالصبر مجبولة ذاتي
ابمصاب الزهرة چن حانت وفاتي - أعز من فاطمة اشعندي ابحياتي
طفيتي شمعة اعيوني يا دنية - أظن وافيتچ اديوني يا دنية
ابهذا اعتابي - ايهيج اصوابي - او نار امصابي - اتظل مستعرة

اخذلتني يا علي او جورك تعدى - وأنا الدنية او دليلي ايفيض حقده
إلي ثار او طلب لازم ترده - الحسن إبنك أگطع بيدي چبده
وأروح إلكربله او سيفي أجرده - او على التربان جسم احسين أوسده
بنينك كلها تتبضع يا حيدر - او بناتك لليسر تطلع يا حيدر
شبولك كلهم - محد إلهم - ينزف دمهم - فوگ الغبرة